ສືບຕໍ່ຮ່ວມມື ແລະ ພັດທະນາວຽກງານການເມືອງ-ແນວຄິດ

ລາຍລະອຽດ

ສ້າງຂື້ນເມື່ອ ວັນສຸກ, 17 ພຶດສະພາ 2019 02:04

ຂຽນໂດຍ ຄອຂ ນະຄອນຫຼວງ

ສືບຕໍ່​​ຮ່ວມ​ມື​ ແລະພັດທະນາ​​ວຽກ​ງານ​ການເມືອງ-ແນວ​ຄິດ.

   ເພື່ອຕອບຮັບຄຳເຊີນຂອງຄະນະໂຄສະນາອົບຮົມ ນະຄອນຫລວງວຽງຈັນ, ຄະນະຜູ້ແທນໂຄສະນາສຶກສານະຄອນຫລວງຮ່າໂນ້ຍ ສສ ຫວຽດນາມ ນຳໂດຍສະຫາຍ ຫງວຽນ ວັນ ຟອງ, ກຳມະການປະຈຳພັກ, ຫົວໜ້າຄະນະໂຄສະນາສຶກສາ ນະຄອນຫລວງຮ່າໂນ້ຍ ໄດ້ນຳຄະນະຢ້ຽມຢາມ - ເຮັດວຽກຢູ່ນະຄອນຫລວງວຽງຈັນ ແລະ ແຂວງຫລວງພະບາງ, ໃນລະຫວ່າງວັນທີ 24-29 ມີນາ 2019.

     ວັນ​ທີ 25 ມີ­ນາ 2019 ທີ່​ຫ້ອງຮັບແຂກ ຫ້ອງ​ວ່າ­ການ​ນະ­ຄອນ­ຫລວງ​ວຽງ​ຈັນ ສະຫາຍ ປອ ສິນ​ລະ​ວົງ ຄຸດ​ໄພທູນ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ເລ­ຂາ​ຄະ­ນະ​ພັກ ເຈົ້າ​ຄອງ​ນະ­ຄອນ­ຫລວງ​ວຽງ​ຈັນ ໄດ້​ຕ້ອນ ຮັບ​ການ​ເຂົ້າ​ຢ້ຽມ​ຂ່ຳ­ນັບ​ຂອງ​ສະຫາຍ ຫງວຽນ ວັນ ຟ໋ອງ ກຳ­ມະ­ການ​ປະ­ຈຳ​ພັກ ຫົວ­ໜ້າ​ຄະ­ນະ​ໂຄ­ສະ­ນາ​ສຶກ​ສາ​ນະຄອນຫລວງຮ່າ​ໂນ້ຍ ພ້ອມ​ຄະ­ນະ ໃນໂອ­ກາດ​ທີ່​ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຮ່ວມ​ກັບ​ຄະ­ນະ​ໂຄ­ສະນາ​ອົບ­ຮົມ ນະ­ຄອນ­ຫລວງ​ວຽງ​ຈັນ ໂອ­ກາດ​ນີ້ສະຫາຍເຈົ້າຄອງ ໄດ້​ຕີ​ລາ­ຄາ​ສູງ​ຕໍ່​ການ​ຢ້ຽມ­ຢາມ ແລະ ເຮັດ​ວຽກ​ຮ່ວມກັນຂອງ​ສອງຄະ ນະ ​ເຊິ່ງ​ເປັນ​ການ​ສືບ­ຕໍ່​ເພີ່ມ​ທະ­ວີ​ສາຍ​ພົວ­ພັນ​ມິດ­ຕະພາບ ​ຄວາມ​ສາ­ມັກ­ຄີ​ພິ­ເສດ​ຂອງ​ສອງ​ພັກ ສອງ​ລັດ ກໍ​ຄື​ປະ­ຊາ­ຊົນ​ສອງ​ຊາດ​ລາວ-ຫວຽດ­ນາມ ເວົ້າ​ລວມ ເວົ້າ​ສະເພາະ ອົງຄະ­ນະ​ພັກ, ອໍາ­ນາດ​ການ​ປົກຄອງ​ຂອງສອງ​ນະ­ຄອນ­ຫລວງ ກໍ​ຄື​ຄະ­ນະ​ໂຄ­ສະ­ນາ​ອົບ­ຮົມ ​ນະ­ຄອນຫລວງ​ວຽງ​ຈັນ ແລະ ຄະ­ນະ​ໂຄ­ສະ­ນາ​ສຶກ​ສາ​ ນະ­ຄອນ­ຫລວງ​ຮ່າ​ໂນ້ຍ ທີ່​ມີ​ການ​ພົວ­ພັນ​ຢ້ຽມ­ຢາມ ແລະ ແລກປ່ຽນ​ບົດຮຽນ​ເຊິ່ງ​ກັນ ແລະ ກັນ​ ໃຫ້​ນັບ​ມື້​ແໜ້ນ​ແຟ້ນ​ຍິ່ງໆ​ຂຶ້ນ.

     ກ່ອນໜ້ານັ້ນ ສະຫາຍ ສຈ ປອ ກິແກ້ວ ໄຂຄຳພິທູນ ເລຂາທິການ​ສູນ​ກາງ​ພັກ ເລ­ຂາ​ຄະ­ນະ​ພັກ ຫົວໜ້າຄະນະໂຄສະນາອົບຮົມສູນກາງພັກ ກໍໄດ້​ໃຫ້ກຽດຕ້ອນ­ຮັບ​ການ​ເຂົ້າ​ຢ້ຽມ​ຂ່ຳ­ນັບ​ຂອງ​ສະຫາຍ ຫງວຽນ ວັນ ຟ໋ອງ ກຳ­ມະ­ການ​ປະ­ຈຳ​ພັກ ຫົວ­ໜ້າ​ຄະ­ນະ​ໂຄ­ສະ­ນາ​ສຶກ​ສາ​ ນະຄອນ ຫລວງຮ່າ​ໂນ້ຍ ສສ ຫວຽດ­ນາມ ພ້ອມ​ຄະ­ນະ ເຊ່ັນດຽວກັນ ຢູ່ທີ່ຫ້ອງຮັບແຂກຂອງຄະນະໂຄສະນາອົບຮົມສູນກາງພັກ.

    ການ​ພົບ​ປະ​ສອງຝ່າຍໄດ້ຈັດຂຶ້ນ​ໃນຕອນເຊົ້າວັນ​ທີ 25 ມີນາ 2019 ທີ່​ຫ້ອງ​ວ່າການ​ ນະຄອນຫລວງວຽງຈັນ ນຳ​ໂດຍ​ສະຫາຍ ເຂັມ​ເພັດ ແພງ​ດວງ​ຈັນ ກຳມະການພັກ ຫົວໜ້າ​ຄະນະ​ໂຄສະນາ​ອົບຮົມ ນະຄອນ ຫລວງວຽງຈັນ ແລະ ສະຫາຍ ຫງວ​​ຽນ ວັນ ຟອງ ກຳມະການປະຈຳພັກ ຫົວໜ້າ​ຄະນະ​ໂຄສະນາ​ສຶກ​ສາ ນະຄອນຫລວງ​ຮ່າ​ໂນ້ຍ ໂດຍມີ​ພະນັກງານ​ກ່ຽວຂ້ອງ​ສອງ​ຝ່າຍ​ເຂົ້າ​ຮ່ວມ ການ​ພົບ​ປະ​ຄັ້ງ​ນີ້ ສອງ​ຝ່າຍ​ໄດ້​ແຈ້ງ​ໃຫ້​ກັນ​ຊາບ​ກ່ຽວ​ກັບ​ສະພາບ​ການ​ພັດທະນາ​ເສດຖະກິດ-ສັງຄົມ ກໍ​ຄື​ການ​ຊຸກ​ຍຸກ​ສົ່ງເສີມ​ການ​ພັດທະນາ​ວຽກ​ງານ​ຂອງ​ຕົນ ໂດຍ​ສະເພາະ​ແມ່ນ​ການ​ແລກປ່ຽນ​ຢ້ຽມຢາມ ແລະ ຮ່ວມ​ມື​ຊ່ວຍເຫລືອ​ເຊິ່ງ​ກັນ ແລະກັນ ພ້ອມ​ນີ້ ສອງ​ຝ່າຍ ຍັງ​ໄດ້​ປືກ​ສາ​ຫາລື ແລະ ເປັນ​ເອກະ​ພາບ​ກັນ ເຊັນບົດ​ບັນທຶກ​ການ​ຮ່ວມ​ມື​ ແຕ່​ນີ້​ຮອດ​ປີ 2020 ໂດຍ​ສອງ​ຝ່າຍ​ໄດ້​ຕົກລົງ​ເຫັນ​ດີ​ໃນ​ການ​ສືບຕໍ່​ແລກປ່ຽນ​ການ​ຮ່ວມ​ມື​ພັດທະນາ​ກ່ຽວ​ກັບ​ວຽກ​ງານ​ການເມືອງ-ແນວ​ຄິດ ແລະ ທິດ​ສະ​ດີ ວຽກ​ງານ​ວາລະສານ ການ​ຜັນ​ຂະຫຍາຍ​ແນວທາງ​ນະໂຍບາຍ​ ມະຕິ​ຕົກລົງ​ຂອງ​ພັກ​ ໄປ​ສູ່​ພະນັກງານ ສະ ມາຊິກ​ພັກ ແລະ ປະຊາຊົນ ການ​ແລກປ່ຽນ​ຂໍ້​ມູນ​ຂ່າວສານ ການ​ຊ່ວຍ​ຍົກ​ລະດັບ​ຄວາມ​ຮູ້​ດ້ານ​ວິຊາ​ການ ແລະອື່ນໆ.

     ໃນ​ໂອກາດ​ນີ້ ຄະນະ​ຜູ້​ແທນ​ຄະນະ​ໂຄສະນາ​ສຶກ​ສາ ນະຄອນຫລວງ​ຮ່າ​ໂນ້ຍ ຍັງ​ໄດ້​ມອບ​ຄອມ​ພີວ​ເຕີ​ໂນດ​ບຸກ ຈຳນວນ 2 ໜ່ວຍ ແລະ ໄອ​ແພັດ 1 ໜ່ວຍ ລວມ​ມູນ​ຄ່າ 17 ລ້ານ​ດົງ ໃຫ້​ຄະນະ​ໂຄສະນາ​ອົບຮົມ ນະ ຄອນຫລວງວຽງຈັນ ເພື່ອ​ນຳ​ໃຊ້​ເຂົ້າ​ໃນ​​ວຽກ​ງານ​ຂອງ​ຕົນ​ຕື່ມ​ອີກ ແລະ ໄລຍະຢູ່ນະຄອນຫລວງວຽງຈັນ ຄະນະ​ຜູ້​ແທນ​ຄະນະ​ໂຄສະນາ​ສຶກ​ສາ ນະຄອນຫລວງຮ່າໂນ້ຍ ຍັງໄດ້ທ່ຽວຊົມພິພິທະພັນໄກສອນ ພົມວິ ຫານ ພິພິທະພັນຫໍພະແກ້ວ ພະທາດຫລວງ ສວນປະຕູໄຊ ແລະ ແຫລ່ງທ່ອງທ່ຽວອື່ນໆ.

     ວັນທີ 27 ມີນາ 2019 ຄະນະ​ຜູ້​ແທນ​ຄະນະ​ໂຄສະນາ​ສຶກ​ສາ ນະຄອນຫລວງຮ່າໂນ້ຍ ໄດ້ເດີນທາງໄປທ່ຽວຊົມສະຖານທີ່ທ່ອງທ່ຽວເມືອງ ວັງວຽງ ແຂວງວຽງຈັນ, ວັນທີ 28 ມີນາ 2019 ຢ້ຽມຢາມ ແລະ ພົບປະກັບ​ຄະນະ​ໂຄສະນາ​ອົບຮົມ ແຂວງຫລວງພະບາງ; ທ່ຽວຊົມວັດພະທາດພູສີ, ວັດຊຽງທອງ, ພິພິທະພັນພະລາດຊະວັງ, ຫັດຖະກຳເຈ້ຍປໍສາ, ຫັດຖະກຳຕ່ຳຫູກແພໄໝ, ແຫລ່ງທ່ອງທ່ຽວຕາດກວາງຊີ ແລະ ໃນວັນທີ 29 ມີນາ 2019 ຄະນະ​ຜູ້​ແທນ​ຄະນະ​ໂຄສະນາ​ສຶກ​ສາ ນະຄອນຫລວງຮ່າໂນ້ຍ ກໍໄດ້ເດີນທາງກັບຄືນປະເທດ. ຫວັງຢ່າງຍິ່ງວ່າການຮ່ວມມື ລະຫວ່າງ ຄະນະໂຄສະນາອົບຮົມນະຄອນຫລວງວຽງຈັນ ກັບຄະນະໂຄສະນາສຶກສານະຄອນ ຫລວງຮ່າໂນ້ຍ ຈະແຕກດອກອອກຜົນ, ງອກງາມ ແລະ ຍືນຍົງຂະໜົງແກ່ນຕະຫລອດໄປ.

• < ຕໍ່ໄປ
• ຕໍ່ໄປ >