ເຂັ້ມງວດ-ຄວບຄຸມສຽງເນືອງນັນ

ສ້າງຂື້ນເມື່ອ ວັນຈັນ, 15 ກຸມພາ 2021 07:59
ຂຽນໂດຍ Anousone

         

ທ່ານ ພັອ ສຸກພະຈັນ ບຸດດາຄໍາ ກຳມະການປະຈຳພັກ ຫົວໜ້າກອງບັນຊາການປ້ອງກັນຄວາມສະ ຫງົບ ນະຄອນຫລວງວຽງຈັນ ໄດ້ກ່າວເນັ້ນຕໍ່ຄະນະພັກ-ຄະນະບັນຊາ ແລະ ພາກສ່ວນທີ່ກ່ຽວຂ້ອງ ໃນ ວັນທີ 25 ມັງກອນ 2021; ໃຫ້ເຂັ້ມງວດ, ກວດກາ ແລະ ຄວບຄຸມສຽງເນືອງນັນ ໃຫ້ຢູ່ໃນເກນທີ່ກໍານົດ ໂດຍປະຕິບັດຕາມຄໍາສັ່ງຂອງທ່ານເຈົ້າຄອງ ສະບັບເລກທີ 620/ຈນວ, ລົງວັນທີ 29 ກັນຍາ 2020 ວ່າດ້ວຍການຄວບຄຸມສຽງເນືອງນັນ ຢູ່ນະຄອນຫລວງວຽງຈັນ.

         

          ສໍາລັບປະເພດ ແລະ ເປົ້າໝາຍສຽງເນືອງນັນ ທີ່ຈະຕ້ອງຄວບຄຸມ ແລະ ແກ້ໄຂ ມີທັງໝົດ 7 ປະ ເພດ; ໃນນີ້, ມີ 3 ປະເພດ ທີ່ຈະຕ້ອງເອົາໃຈໃສຢ່າງເຂັ້ມງວດ ຄື: 1 ສຽງດັງຈາກສະຖານທີ່ບັນເທີງ, 2 ສຽງດັງຈາກລົດຍົນເກີນຂະໜາດ ແລະ ກຸ່ມແກ້ງຂີ້ລົດກວນເມືອງ ແລະ 3 ສຽງດັງຈາກໝາກກະໂພກ. ຍ້ອນວ່າສຽງເນືອງນັນດັ່ງກ່າວໄດ້ເປັນມົນລະຜິດທາງສຽງ ສົ່ງຜົນກະທົບຕໍ່ການດໍາລົງຊີວິດ ແລະ ຄວາມເປັນລະບຽບຮຽບຮ້ອຍໃນສັງຄົມ.

          ທ່ານຫົວໜ້າກອງບັນຊາການ ໄດ້ມີຄໍາເຫັນຊີ້ນໍາຕໍ່ບັນດາຫ້ອງ-ກອງບັນຊາການເມືອງ ໃຫ້ສົມທົບກັບພາກສ່ວນທີ່ກ່ຽວຂ້ອງ ສ້າງເປັນແຜນການເຄື່ອນໄຫວຢ່າງລະອຽດ, ໂດຍແບ່ງຄວາມຮັບຜິດຊອບລົງໂຄສະ ນາປຸກລະດົມ, ພ້ອມທັງລົງກວດກາ, ແກ້ໄຂຕາມຂໍ້ກໍານົດມາດຕະການໃນການຄວບຄຸມສຽງເນືອງນັນ ດັ່ງ ນັ້ນ: ຕາມສະຖານທີ່ບັນເທີງ ແມ່ນກໍານົດລະດັບສຽງບໍ່ໃຫ້ເກີນ 80 ດີຊີເບວ (80 DB) ວັດແທກຢູ່ຂ້າງນອກຈຸດທີ່ໄດ້ຮັບຜົນກະທົບ ແລະ ເວລາເປີດ-ປິດບໍລິການ 18:00 ໂມງ ຫາ 23:30 ໂມງ; ສຽງຈາກລົດຍົນແມ່ນໃຫ້ປະຕິບັດຕາມມາດຕະຖານເຕັກນິກພື້ນຖານຂອງພາຫະນະ, ເຄື່ອງຈັກບໍ່ໃຫ້ມີຜົນກະທົບກັບຜູ້ຢູ່ອ້ອມຂ້າງຖະໜົນ ແລະ ລະດັບສຽງສູງສຸດບໍ່ໃຫ້ເກີນ 85 ດີຊີເບວ (85 DB) ຈາກຈຸດວັດແທກ 7,5 ແມັດ, ສໍາລັບກຸ່ມແກ້ງແຂ່ງລົດ, ຂີ້ລົດກວນເມືອງ ຖືເປັນການລະເມີດກົດໝາຍຈະລາຈອນທາງບົກ ແລະ ຈະຖືກກັກຕົວຊົ່ວຄາວທັນທີ 24 ຊົ່ວໂມງ ແລ້ວໃຫ້ຜູ້ປົກຄອງມາຮັບປະກັນຕົວ ທັງປັບໃໝ ແລະ ຖືກດໍາເນີນຄະດີ; ສ່ວນສຽງເນືອງນັນຈາກໝາກກະໂພກ ຖ້າບຸກຄົນ, ນິຕິບຸກຄົນ ນໍາໃຊ້ໝາກກະໂພກບໍ່ໄດ້ຮັບອະນຸຍາດຈາກເຈົ້າໜ້າທີ່ປ້ອງກັນຄວາມສະຫງົບ ຈະຖືກກ່າວເຕືອນ, ປັບໃໝ ແລະ ຖືກດໍາເນີນຄະດີຕາມລະບຽບການ ແລະ ກົດໝາຍ.