ໂຄງການກໍ່ສ້າງລະບົບປ້ອງກັນນໍ້າຖ້ວມ ແລະ ສວນສາທາລະນະ

ສ້າງຂື້ນເມື່ອ ວັນພະຫັດ, 12 ພຶດສະພາ 2022 04:47
ຂຽນໂດຍ ຄອຂ ນະຄອນຫຼວງ

ໂຄງການກໍ່ສ້າງລະບົບປ້ອງກັນນໍ້າຖ້ວມ ແລະ ສວນສາທາລະນະ

ທ່ານ ປອ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ, ທ່ານນາງ ວິໄລຄໍາ ໂພສາລາດ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ທ່ານ ອີມ ມູຮົງ ເອກອັກຄະລັດຖະທູດ ສ ເກົາຫລີ ປະຈໍາສປປ ລາວ ພ້ອມດ້ວຍແຂກຖືກເຊີນ ແລະ ພາກສ່ວນທີ່ກ່ຽວຂ້ອງ ໄດ້ເຂົ້າຮ່ວມພິທີເປີດການກໍ່ສ້າງໂຄງການປ້ອງກັນຕາຝັ່ງເຈື່ອນ ແລະ ພັດທະນາແຄມຂອງ ໄລຍະ II ທີ່ຈັດຂຶ້ນໃນວັນທີ 4 ມີນາ 2022 ຢູ່ເຂດແຄມຂອງ ເມືອງສີສັດຕະນາກ.

ທ່ານ ສຸລິວັນ ພົມມະຫາໄຊ ຫົວໜ້າພະແນກໂຍທາທິການ ແລະຂົນສົ່ງ ກ່າວວ່າ: ໂຄງການນີ້ເປັນໂຄງ ການໜຶ່ງທີ່ໄດ້ຮັບການສະໜັບສະໜູນເງິນກູ້ດອກເບ້ຍຕໍ່າຈາກ ສ ເກົາຫລີ ເຊິ່ງໄດ້ເຊັນສັນຍາກູ້ຢືມໃນວັນທີ 1 ພະຈິກ 2017 ລະຫວ່າງ ກະຊວງການເງິນ ສປປ ລາວ ແລະ ທະນາຄານ ນໍາເຂົ້າ ແລະ ສົ່ງອອກ ສ ເກົາ ຫລີ ເພື່ອກໍ່ສ້າງລະບົບປ້ອງກັນນໍ້າຖ້ວມ ປ້ອງກັນດິນເຊາະເຈື່ອນຕາມລໍາແມ່ນໍ້າຂອງ ແລະ ສວນສາທາລະນະ ຢູ່ບ້ານວັດນາກ ເມືອງສີສັດຕະນາກ (ເຂດຫລັກ 3) ຫາ ບ້ານຫາດດອກແກ້ວ ເມືອງຫາດຊາຍຟອງ ລວມມູນຄ່າ 57.605.000 ໂດລາ ແລະ ທຶນສົມທົບຈາກລັດຖະບານລາວ 9.957.000 ໂດລາ ລວມທັງໝົດ 67.562.000 ໂດລາ ປະກອບມີໜ້າວຽກຕົ້ນຕໍຄື: ຍົກລະດັບຄູປ້ອງກັນນໍ້າ ແລະ ກໍ່ສ້າງລະບົບປ້ອງກັນຕາຝັ່ງ ເຈື່ອນ ປະເພດ Rip-Rap ແຕ່ຫລັກ 3 ບ້ານວັດນາກ ຫາ ເຂດທ່າເຮືອຫລັກ 4 ມີຄວາມຍາວ 0,97 ກິໂລແມັດ ກໍ່ສ້າງຄູປ້ອງກັນນໍ້າຖ້ວມ ປັບໜ້າສັນຄູກັນນໍ້າໃຫ້ສາມາດນໍາໃຊ້ເປັນເສັ້ນທາງລຽບຕາມແຄມຂອງ ດ້ວຍການປູຢາງ 2 ຊັ້ນ ຕິດຕັ້ງລະບົບໄຟເຍືອງທາງ ແລະ ກໍ່ສ້າງຮ່ອງລະບາຍນໍ້າລຽບຕີນຄູກັນນໍ້າ ກໍ່ສ້າງລະບົບປ້ອງກັນຕາຝັ່ງເຈື່ອນ ປະເພດ Rip-Rap ປ້ອງກັນການເຊາະເຈື່ອນຍາວ 8,36 ກິໂລແມັດ ຈາກເຂດທ່າເຮືອຫລັກ 4 ເມືອງສີສັດຕະນາກ ຫາ ບ້ານຫາດດອກແກ້ວ ເມືອງຫາດຊາຍຟອງ ກໍ່ສ້າງສວນສາທາລະນະ ເນື້ອທີ່ 5,9 ເຮັກຕາ ຢູ່ເຂດບ້ານແກ້ງຍາງ ໃຫ້ເປັນບ່ອນພັກຜ່ອນ ເປັນແຫລ່ງທ່ອງທ່ຽວຂອງຊຸມຊົນ ແລະ ເຂດສີຂຽວຂອງຕົວເມືອງ ຍົກລະດັັບສັນຄູກັນນໍ້າຂອງ ໂຄງການໄລຍະທີ I ແຕ່ບ້ານອຸບມຸງ ຫາ ບ້ານເກົ້າລ້ຽວ ຍາວ 4,4 ກິ ໂລແມັດ ລຽບຕາມແຄມຂອງ ໃຫ້ເປັນເສັ້ນທາງເບຕົງ ຕິດຕັ້ງລະບົບໄຟເຍືອງທາງ ແລະ ກໍ່ສ້າງຮ່ອງລະບາຍນໍ້າ ລຽບຕີນຄູກັນນໍ້າ.

ທ່ານເຈົ້າຄອງ ໄດ້ກ່າວວ່າ: ການຈັດຕັ້ງປະຕິບັດໂຄງການນີ້ ແມ່ນສືບເນື່ອງມາຈາກຄວາມສໍາເລັດຂອງໂຄງການປ້ອງກັນຕາຝັ່ງເຈື່ອນ ແລະພັດທະນາແຄມຂອງ ໄລຍະ I ເຊິ່ງບໍ່ພຽງແຕ່ເປັນແນວຄິດການອອກແບບ ການກໍ່ສ້າງຄູປ້ອງກັນນໍ້າຖ້ວມ ການປົກປັກຮັກສາປ້ອງກັນດິນທີ່ເຊາະເຈື່ອນຈາກໄພພິບັດທາງນໍ້າ ເພື່ອຮັກສາຊັບສົມບັດ ຊັບສິນອັນມີຄ່າຂອງປະຊາຊົນຊາວນະຄອນຫລວງວຽງຈັນ ເທົ່ານັ້ນ ຍັງເປັນການປົກປັກຮັກສາເຂດແດນຂອງ ສປປ ລາວ ບໍ່ໃຫ້ຖືກນ້ຳກັດເຊາະ ແລະ ເສຍຫາຍໄປກັບໄພທໍາມະຊາດ ຜົນສໍາເລັດຂອງໂຄງການ ໄລຍະທີ I ຍັງເຮັດໃຫ້ນະຄອນຫລວງວຽງຈັນ ມີສະຖານທີ່ທ່ອງທ່ຽວ ເປັນບ່ອນອອກກໍາລັງກາຍໃນຍາມແລງ ແລະ ຮັບຕ້ອນບັນດາແຂກທັງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວນະຄອນຫລວງວຽງຈັນ ແລະຍັງເປັນສະຖານທີ່ ທີ່ສາມາດສ້າງລາຍຮັບໃຫ້ນະຄອນຫລວງວຽງຈັນອີກບ່ອນໜຶ່ງ ສິ່ງທີ່ສໍາຄັນຄືຈຸດດັ່ງກ່າວນີ້ ໄດ້ກາຍເປັນສັນຍາລັກຂອງການຮ່ວມມື ລະຫວ່າງສອງປະເທດ ກໍຄືປະຊາຊົນສອງຊາດ ສປປ ລາວ ແລະ ສ ເກົາ ຫລີ ເຊິ່ງອະດີດການນໍາສູງສຸດ ຂອງທັງສອງປະເທດ ໄດ້ຮ່ວມກັນປູກຕົ້ນໄມ້ ໄວ້ເປັນສັນຍາລັກຂອງການຮ່ວມມື ຜົນສໍາເລັດຂອງໂຄງການປ້ອງກັນຕາຝັ່ງເຈື່ອນ ແລະພັດທະນາແຄມຂອງ ໄລຍະ I ໄດ້ກາຍເປັນໂຄງການຕົວແບບໃຫ້ແຂວງຕ່າງໆ ນໍາໄປຈັດຕັ້ງປະຕິບັດໃນແຂວງຂອງຕົນເຊັ່ນ: ແຂວງຈໍາປາສັກ ແລະ ສະຫວັນນະເຂດ ແລະ ຄາດວ່າຈະມີແຂວງອື່ນໆອີກ.