ເປີດການນຳໃຊ້ລົດເມໄຟຟ້າ

ສ້າງຂື້ນເມື່ອ ວັນພະຫັດ, 12 ພຶດສະພາ 2022 04:55
ຂຽນໂດຍ ຄອຂ ນະຄອນຫຼວງ

ເປີດການນຳໃຊ້ລົດເມໄຟຟ້າ

      ທ່ານ ປອ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ ພ້ອມດ້ວຍທ່ານ ພູຂົງ ບັນ ນະວົງ ຮອງເຈົ້າຄອງ ໄດ້ເປັນກຽດເຂົ້າຮ່ວມພິທີເປີດທົດລອງການນໍາໃຊ້ລົດເມໄຟຟ້າ ເພື່ອບໍລິການຂົນສົ່ງສາທາລະນະໃນນະຄອນຫລວງວຽງຈັນ ຈັດຂຶ້ນໃນວັນທີ 23 ມີນາ 2022.

      ທ່ານ ແກ້ວວັນພອນ ວອນທີວົງສີ ຜູ້ອໍານວຍການລັດວິສາຫະກິດລົດເມ ກ່າວວ່າ: ເພື່ອຜັນຂະຫຍາຍນະໂຍບາຍ 6ສ ຂອງນະຄອນຫລວງວຽງຈັນ ໂດຍສະເພາະ ສ.ສະອາດ ປາສະຈາກມົນລະພິດທາງອາ ກາດໃຫ້ເປັນຈິງເທື່ອລະກ້າວ, ການນໍາໃຊ້ລົດເມໄຟຟ້າຂົນສົ່ງສາທາລະນະໃຫ້ສອດຄ່ອງກັບເປົ້າໝາຍ ແລະ ນະໂຍບາຍຂອງໂຄງການ ການຈຳກັດການປ່ອຍອາຍກາກບອນອອກສູ່ຊັ້ນບັນຍາກາດໃນເຂດຕົວເມືອງສີ ຂຽວ ໂດຍການຮ່ວມມືຜ່ານກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ສປປ ລາວ ແລະ ກະຊວງນິເວດ ແລະ ສິ່ງແວດລ້ອມ ສປ ຈີນ ພາຍໃຕ້ໂຄງການໃຕ້-ໃຕ້ ຕໍ່ກັບການປ່ຽນແປງດິນຟ້າອາກາດຂອງ ສປ ຈີນ ສາທິດການປ່ອຍອາຍກາກບອນຕໍ່າ, ລັດວິສາຫະກິດລົດເມ ຈຶ່ງໄດ້ເປີດການນຳໃຊ້ລົດເມໄຟ ຟ້າ ຈຳນວນ 4 ຄັນ ແລະ ແລ່ນໃຫ້ບໍລິການໃນ 3 ສາຍທາງຄື:

  1. ສາຍທາງທີ 48 ຈາກສະຖານີລົດເມຂົວດິນ-ດົງນາໂຊກ-ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ-ສີເກີດ ໄລຍະທາງ 15 ກິໂລແມັດ ຄ່າໂດຍສານ 5.000 ກີບຕໍ່ຄົນ.
  2. ສາຍທາງທີ 35 ຈາກສະຖານີລົດເມຂົວດິນ-ສູນການຄ້າທາດຫລວງພລາຊາ-ຕະຫລາດຫົວຂົວ-ສະຖານີລົດໄຟລາວ-ຈີນ ໄລຍະທາງ 17 ກິໂລແມັດ ລາຄາ 5.000 ກີບຕໍ່ຄົນ.
  3. ສາຍທາງທີ 22 ຈາກສະຖານີລົດເມຂົວດິນ-ຕະຫລາດທາດຫລວງ-ສໍານັກງານປົກຄອງເມືອງໄຊເສດຖາ-ສູນການຄ້າລາວ-ໄອເຕັກ-ເຂດເສດຖະກິດພິເສດບຶງທາດຫລວງ-ສະຖານີລົດໄຟລາວ-ໄທ-ຕະ ຫລາດໄຮຄຳ-ເຂດເສດຖະກິດກວມລວມໄຊເສດຖາ (ຫລັກ 21)-ສະຖານີລົດໄຟລາວ-ຈີນ ໄລຍະທາງ 26 ກິໂລແມັດ ຄ່າໂດຍສານ 8.000 ກີບຕໍ່ຄົນ.

ເປີດໃຫ້ບໍລິການໂດຍບໍ່ເສຍຄ່າ ໃນໄລຍະທົດລອງແລ່ນພາຍໃນ 3 ອາທິດ ຄືເລີ່ມແຕ່ວັນທີ 23 ມີນາ – 13 ເມສາ 2022 ແລະ ຖ້າສົມທຽບຄ່າໂດຍສານລະຫວ່າງລົດເມທີ່ໃຊ້ນໍ້າມັນ ກັບລົດເມໄຟຟ້າ ແມ່ນຖືກກວ່າ 25%.