ກຸ່ມບໍລິສັດ FLC ສົນໃຈລົງທຶນຢູ່ນະຄອນຫລວງວຽງຈັນ

ລາຍລະອຽດ

ສ້າງຂື້ນເມື່ອ ວັນພະຫັດ, 12 ພຶດສະພາ 2022 05:04

ຂຽນໂດຍ ຄອຂ ນະຄອນຫຼວງ

ກຸ່ມບໍລິສັດ FLC ສົນໃຈລົງທຶນຢູ່ນະຄອນຫລວງວຽງຈັນ

ທ່ານ ປອ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານນາງ ເຮືອງເຈີນ ກ້ຽວຢຸງ ຮອງປະທານ ຜູ້ປະຈຳການກຸ່ມບໍລິສັດ ການເງິນອະສັງຫາລິມະຊັບ ແລະການຄ້າ (FLC) ສສ ຫວຽດນາມ ພ້ອມຄະນະ ໃນວັນທີ 23 ມີນາ 2022 ທີ່ຫ້ອງວ່າການ, ໃນໂອກາດທີ່ເດີນທາງຕິດຕາມທ່ານ ລັດຖະມົນ ຕີກະຊວງແຜນການ ສສ ຫວຽດນາມ ມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 20-23 ມີນາ 2022.

ການເຂົ້າຢ້ຽມຂ່ຳນັບຂອງຄະນະໃນຄັ້ງນີ້ ເພື່ອແນະນໍາກ່ຽວກັບການເຄື່ອນໄຫວທຸລະກິດລົງທຶນທີ່ພົ້ນເດັ່ນຂອງບໍລິສັດ ແລະ ຖືໂອກາດນີ້ເພື່ອຂໍທິດຊີ້ນຳໃນການລົງທຶນກ່ຽວກັບອະສັງຫາລິມະຊັບ ຢູ່ນະຄອນ ຫລວງວຽງຈັນ ເຊິ່ງກຸ່ມບໍລິສັດ FLC ຖືວ່າເປັນກຸ່ມບໍລິສັດໄດ້ຮັບການພັດທະນາຢ່າງວ່ອງໄວ ແລະຂະ ຫຍາຍຕົວສູງ ຕະຫລອດໄລຍະຂອງການຮ່ວມຕົວໃນປີ 2011 ເປັນຕົ້ນມາ ກໍຄືໃນປະຈຸບັນ ບໍລິສັດໄດ້ລົງທຶນໃນຂະແໜງການອະສັງຫາລິມະຊັບທີ່ພົ້ນເດັ່ນຫລາຍໂຄງການ ແລະມີກວ່າ 400 ໂຄງການພັດທະ ນາຢູ່ໃນທົ່ວປະເທດຫວຽດນາມ ເປັນຕົ້ນ: ໂຄງການສ້າງສູນລວມການທ່ອງທ່ຽວ ແລະ ເຂດທ່ອງທ່ຽວຜ່ອນ ຄາຍໂດເຊີນ ສູນການຄ້າຄອມເພັກ ລີສອດສະໜາມກ໊ອຟຢູ່ທະເລແຂວງກວາງງາຍ ເຂດໂຮງແຮມທີ່ພັກ ຢູ່ແຂວງກວາງນິງ ແຂວງບິງດິງ ແຂວງແຫງະອານ ແຂວງວົງຟິກ ແລະ ແຂວງອື່ນໆ.

   ໂອກາດນີ້ ທ່ານເຈົ້າຄອງ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ກຸ່ມບໍລິສັດ FLC ພ້ອມທັງໄດ້ສະເໜີສະພາບຈຸດພິເສດ ແລະ ທ່າແຮງບົ່ມຊ້ອມດ້ານຕ່າງໆໃນການພັດທະນາຢູ່ນະຄອນຫລວງວຽງຈັນ ໃຫ້ຄະນະໄດ້ຮັບຊາບ ແລະ ສະເໜີແລກປ່ຽນບາງຄໍາເຫັນທີ່ຈະນຳໄປສູ່ການດຶງດູດການລົງທຶນຈາກ ສສ ຫວຽດ ນາມ ກໍຄືກຸ່ມບໍລິສັດດັ່ງກ່າວ ເຂົ້າມາລົງທຶນໃນຂະແໜງການອະສັງຫາລິມະຊັບຢູ່ນະຄອນຫລວງວຽງຈັນ ໃຫ້ນັບມື້ຫລາຍຂຶ້ນ.

• < ຕໍ່ໄປ
• ຕໍ່ໄປ >