ພິທີເປີດຮຽນທິດສະດີການເມືອງການປົກຄອງຊັ້ນຕົ້ນ ຮຸ່ນທີ 39

ສ້າງຂື້ນເມື່ອ ວັນພະຫັດ, 19 ພຶດສະພາ 2022 03:43
ຂຽນໂດຍ ຄອຂ ນະຄອນຫຼວງ

ພິທີເປີດຮຽນທິດສະດີການເມືອງການປົກຄອງຊັ້ນຕົ້ນ ຮຸ່ນທີ 39

         ພິທີເປີດຊຸດຮຽນທິດສະດີການເມືອການປົກຄອງຊັ້ນຕົ້ນຮຸ່ນທີ 39 ພະແນກສາທາລະນະສຸກນ.ວ ຊຸດທີ 1 ໄດ້ຈັດຂຶ້ນໃນວັນທີ 18 ພຶດສະພາ 2022 ຢູ່ທີ່ພະແນກດັ່ງກ່າວໂດຍການເຂົ້າຮ່ວມຂອງທ່ານ ຊົງເລົ່າ ຢົງນູ ກໍາມະການປະຈໍາພັກ ຫົວຫນ້າຄະນະໂຄສະນາອົບຮົມ ນ.ວ, ມີຮອງຫົວ ຫນ້າກົມຈັດຕັ້ງກະຊວງສາທາລະນະສຸກ, ຫົວຫນ້າພະແນກສາທາລະນະສຸກ ນ.ວ ພ້ອມດ້ວຍນັກ ສຶກສາເຂົ້າຮ່ວມ.

        ໃນພິທີທ່ານ ນ. ວຽງພອນ ແກ້ວຄູນສີ ຫົວຫນ້າໂຮງຮຽນການເມືອງການປົກຄອງ ນະຄອນຫຼວງວຽງຈັນ ໄດ້ລາຍງານໂຄງການດໍາເນີນການຮຽນການສອນທິດສະດີການເມືອງການປົກຄອງຊັ້ນຕົ້ນຮຸ່ນທີ 39 ວ່າ : ໃນຊຸດຮຽນດັ່ງກ່າວນີ້ ນັກສຶກສາຈໍານວນ 44 ສະຫາຍ ຈະໄດ້ຄົ້ນຄວ້າຮໍ່າຮຽນຕາມໂຄງການຫຼັກສູດທິດສະດີການເມືອງ ແລະ ການປົກຄອງຊັ້ນຕົ້ນ 3 ເດືອນ ທີ່ສະຖາບັນການເມືອງ ການປົກຄອງແຫ່ງຊາດວາງອອກ ລວມມີທັງຫມົດ 9 ວິຊາຄື : ວິຊາປັດສະຍາມາກ-ເລນິນ, ວິຊາເສດຖະສາດການເມືອງມາກ-ເລນິນ, ວິຊາລັດທິສັງຄົມນິຍົມວິທະຍາສາດ, ວິຊາທິດສະດີລັດ ແລະ ກົດໝາຍ, ວິຊາກໍ່ສ້າງພັກ, ຄຸ້ມຄອງເສດຖະກິດ, ວິຊາການເມືອງວິທະຍາ, ວິຊາການປົກຄອງ ແລະ ວິຊາຂົນຂວາຍກໍ່ສ້າງຮາກຖານ ລວມມີ 14 ຫນ່ວຍກິດ ໃນນີ້ ມີຊົ່ວໂມງບັນຍາຍ, ແກ້ຂໍ້ຂ້ອງໃຈ, ສອບເສັງ, ທັດສະນະ ແລະ ອື່ນໆ. ພິເສດໂດຍປະຕິບັດຕາມການຊີ້ນໍາ ແລະ ຄວາມຮຽກ ຮ້ອງຕ້ອງການໃນໄລຍະໃຫມ່ ໂຮງຮຽນໄດ້ເພີ່ມພາກແນວທາງ ແລະ ວຽກງານຈຸດສຸມຂອງ ນ.ວ ເຂົ້າຕື່ມ 7 ຫົວຂໍ້ ເຊັ່ນ : ມະຕິກອງປະຊຸມໃຫ່ຍຄັ້ງທີ 11 ຂອງພັກປະຊາຊົນ ປະຕິວັດລາວ, ມະຕິວ່າດ້ວຍການພັດທະນາ ນ.ວ ໃນໄລຍະໃຫມ່, ມະຕິກອງປະຊຸມໃຫ່ຍຄັ້ງທີ 7 ຂອງອົງຄະນະພັກ ນ.ວ, ແຜນພັດທະນາເສດຖະກິດສັງຄົມຄັ້ງທີ 9 ຂອງນ.ວ, ແຜນຜັງຕົວເມືອງສະບັບທີ 3, ແຜນພັດທະນາວຽກແຮງງານ ແລະ ສະຫວັດດີການສັງຄົມ ແລະ ວຽກງານຈຸດສຸມຂອງຄະນະພັກຮາກຖານພະແນກສາທາລະນະສຸກ. ໂດຍການຮຽນການສອນ ອາທິດໜຶ່ງຮຽນ 2 ວັນຄື : ວັນສຸກ ແລະ ວັນເສົາ ມື້ໜື່ງຮຽນ 7 ຊົ່ວໂມງ. ເພື່ອຮັບປະກັນໃຫ້ຊຸດຮຽນຄັ້ງນີ້ ບັນລຸຕາມຈຸດປະສົງ ແລະ ລະ ດັບຄາດໝາຍທີ່ວາງໄວ້ ທາງໂຮງຮຽນໄດ້ວາງມາດຕະການຈັດຕັ້ງປະຕິບັດ ໂດຍໃຫ້ພະນັກງານຄູ-ອາຈານ ແລະ ນັກສຶກສາຖືເອົາການຮຽນການສອນ ແມ່ນໜ້າທີ່ການເມືອງຕົ້ນຕໍຂອງຕົນທີ່ພັກ-ລັດມອບໝາຍໃຫ້, ຕ້ອງຮັກສາ ແລະ ສົ່ງເສີມລັກສະນານໍາໜ້າເປັນແບບຢ່າງຢູ່ສະເໝີ, ຕ້ອງຍົກສູງນໍ້າໃຈຮັບຜິດຊອບຕໍ່ການຮຽນການສອນ ແລະ ເພີ່ມທະວີຄວາມສາມັກຄີພາຍໃນ ແລະ ພາຍນອກ. ທັງນີ້ ເພື່ອເຮັດໃຫ້ຄະນະຫນ່ວຍພັກ, ສະມາຊິກພັກ, ຫົວຫນ້າຂະແຫນງ ແລະ ພະນັກງານວິຊາການ ທີ່ແມ່ນເປົ້າຫມາຍສ້າງເປັນພະນັກງານສືບທອດ ຢູ່ພະແນກສາທາລະນະສຸກ ກໍາແຫນ້ນທິດສະດີມາກເລນີນ, ບັນດາແຜນພັດທະນາຕາມໂຄງການຫຼັກສູດທິດສະດີການເມືອງການປົກຄອງຊັ້ນຕົ້ນວາງອອກ ທັງເປັນການຍົກສູງຄຸນນະພາບບຸກຄະລາກອນ ໃຫ້ສາມາດຈັດຕັ້ງປະຕິບັດໜ້າທີ່ການ ເມືອງຂອງຕົນ ຢູ່ຂັ້ນຮາກຖານໄດ້ເປັນຢ່າງດີ.